RIGHT TO LIFE (Section 33 ’99 Constitution) as interpreted by Seun Lari-Williams

Everybody na im get 
Right to life.
So nobody fit take person life 
anyhow im like.
No be small right be dis o,
Dis right no be toy!
Without right to life,
which right you fit enjoy?

But e get when law talk sey
Dem fit take person life o:
If dem carry criminal go court,
And court say make dem kill am
Omo, na die be dat o!
im own don finish be dat.
As far sey dat na de punishment for
de tin wey im do

When cat sleep,
Rat come bite im tail,
Na wetin im dey find?
Dat’s why law talk sey
person fit defend imself,
or anoda person
or even im property from Wahala
Abi e no good?

So if person dey im own jeje,
And Wahala come find am trouble
And Wahala come die
as two of dem dey struggle,
As far sey de kain power wey
Person use no too plenty
And law allow am use am,
Na saara die Wahala die!

And if dey wan arrest person
wey law sey make dem arrest,
As far sey dem use de kain power
wey law allow dem use,
and dem no over do,
If de person die,
Na saara die be dat o!
Dem no break im right to life.

If person wey dey for prison
abi detention try escape,
and as dem wan try catch am, 
somehow somehow, im die nko?
As far sey law allow dem use
De kain power wey dem use,
and dem no over do,
Na saara die be dat o!

E never finish o.

If dem dey fight riot
abi serious katakata dey,
And as dem dey try quench am,
Person die,
As far sey law allow dem use
de kain power wey dem use,
and dem no over do,
Na saara die be dat one sef!

For law eye,
Dem no break im right to life

I don finish.
But e never finish o!
For more information, abeg
follow your lawyer talk.